EAJ-PNV Galdakaok etxebizitza politika estrukturala eskatzen du udalerrian

Alderdi jeltzaleak ohartarazi du Aperribai gune tentsionatu izendatzea eta gazteentzako alokairurako laguntza berriak unean uneko neurriak direla, eta ez dutela Galdakaoko etxebizitza nahikorik eta eskuragarririk ezaren arazo estrukturala konpontzen.

Aperribai bizitegi-merkatuko gune tentsionatu izendatu da, Etxebizitzaren Euskal Legean aurreikusitako figura, merkatuan tentsio-maila altuak detektatzen direnean alokairuaren prezioa mugatzeko aukera ematen duena. Galdakaoren kasuan, deklarazio hori udalerriko sektore oso zehatz batera mugatzen da, eta etxebizitza-parke oso txiki bati eragiten dio.

EAJ-PNV Galdakaotik positibotzat jotzen dugu neurri honek eremu zehatz horretan gehiegizko prezioei eusten lagundu ahal izatea, baina azpimarratu nahi dugu ez diola sakoneko egitura-arazoari heltzen: udalerri osoan etxebizitza nahikorik eta irisgarririk ez izateari.

Urritik aurrera 18 eta 35 urte bitarteko gazteentzako alokairu-laguntzak irekitzeari buruz gobernu-taldeak egin berri duen iragarpenari dagokionez, uste dugu ekimen baliagarria dela unean uneko egoerak arintzeko, baina berriro diogu "gazteen emantzipazioak eta etxebizitza modu duinean eskuratzeak epe ertain eta luzerako plan integrala eskatzen dutela".

Ildo horretan, EAJ-PNV Galdakaotik ezinbestekotzat jotzen dugu udal plan anbiziotsu eta errealista batean aurrera egitea, etxebizitza publikoen parkea handitzea, alokairu soziala bultzatzea, etxebizitza hutsak mobilizatzea eta belaunaldien arteko etxebizitza partekatuaren proiektua abian jartzea barne hartuko dituena. Azken ekimen hori EAJ-PNVk sustatu zuen, eta udal-aurrekontuetan txertatu zen.