EAJ-PNV Galdakaoko Batzokiaren aurkako beste eraso bandaliko bat salatu du: azken sei hilabeteetan jasan dugun laugarrena da

EAJ-PNV Galdakaok publikoki salatu nahi du 2025eko apirilaren 7ko goizaldean berriro ere erasoa jasan dugula, oraingoan Batzokiaren sarreran igeltsu kantitate handi bat bota baitute, modu bandalikoan. Materiala fatxadaren eta espaloien gainean zabaldu dute nahita, kalteak eraginez eta Batzokiaren ohiko jarduera zailduz.

Gertakari hauen aurrean, alderdiaren ordezkariok Udaltzaingora jo dugu goizean bertan dagokion salaketa jartzera. Eskerrak eman nahi dizkiegu garbiketa-zerbitzuei beren esku-hartze azkarragatik, eta baita Udaltzaingoari ere lankidetzagatik.

Eraso hau azken hilabeteetan pairatu dugun mehatxu eta eraso kate larri baten parte da:

• 2024ko urriaren 24an: gure bulego politikoaren fatxadan pintaketa iraingarriak agertu ziren.

  
  

  

• 2024ko abenduaren 23an: suhiltze-gailu bat utzi zuten Batzokiaren sarreran; gertakari oso larria izan zen, eta dagokion salaketa jarri genuen agintari eskudunen aurrean.

  

• 2025eko apirilaren 5ean, larunbata, 02:30ean: pertsona batek botila bat hautsi zuen Batzokiaren kristal baten aurka eta, ondoren, terrazako mahaigain guztiak irauli zituen, kalteak eraginez eta liskarra bilatuz.

  
  

• 2025eko apirilaren 7an: igeltsuarekin egindako erasoa, Batzokiaren sarrera nagusian, kalte material nabarmenekin.

  
  

  

EAJ-PNV Galdakaotik irmoki salatzen ditugu horrelako ekintzak. Ez gaituzte kikilduko, ezta gure bidea aldaraziko ere. Gure balore demokratikoek eta bizikidetza- eta errespetu-printzipioek bultzatzen gaituzte, eta horietan sakontzen jarraituko dugu.

Tamalgarria da XXI. mendean oraindik ere diskurtso bakarra inposatu nahi dutenek indarkeria sinbolikoa, mehatxua eta probokazioa erabili behar izatea. Galdakao bakean, aniztasunean eta elkarrizketan oinarritutako herria izatea nahi dugu, non ideologia desberdinek elkarrekin bizitzeko espazioa izan dezaten, betiere errespetuan oinarrituta.

Eskerrik beroenak helarazi nahi dizkiegu gure afiliatuei, jarraitzaileei eta herritarrei jasotzen ari garen babesagatik. Zuen berotasuna da gorrotoa zabaldu nahi dutenen aurrean gure erantzunik onena.