EAJ-PNV Galdakaok kezka agertu du Urretako ezbehar larriaren aurrean eta azalpenak exijitzen ditu

EAJ-PNV Galdakaotik gure elkartasuna adierazi nahi diegu zauritutakoei eta haien senideei, Urretako jaien baitan drift erakustaldi batean gertatutako istripu larria dela eta.

Gutxienez sei pertsona zauritu dira ibilgailu batek terrazan jo ostean, eta gertatutakoak erantzun arduratsua eta gardena eskatzen du Udalaren aldetik.

Oposizioko udal-talde gisa, informazio formala eskatu diogu gobernu-taldeari: jardueraren baimenak, antolatzailearen izendapena, aurreikusitako segurtasun-neurriak eta arriskuen txosten teknikorik egon den jakiteko.

Halako arrisku-maila duten jarduerek segurtasun-neurri zorrotzak izan behar dituzte herritarren segurtasuna bermatzeko.

Gobernuari eskatzen diogu gertatutakoa ikertzeko, erantzukizunak argitzeko eta etorkizuneko jaietan halakorik ez gertatzeko neurri sendoak hartzeko.

EAJ-PNVren aldetik, jai seguru, ireki eta ondo antolatuen aldeko konpromisoa berresten dugu, non herritarrek lasaitasunez gozatu ahal izango duten.